Bankamenn blekktu sjálfa sig

Árni Mathiesen, fyrrverandi fjármálaráðherra, segist ekki hafa borið ábyrgð á því að hafa eftirlit með bönkunum eða gera tillögur um það hvernig ætti að bregðast við þeirri stöðu sem var komin upp þegar í ljós kom að starfsemi bankanna byggðist á blekkingu. Árni var gestur Kastljóssins á RÚV í kvöld.

Árni sagði að bankamenn hefðu beitt blekkingum um stöðu bankanna í aðdraganda að bankahruninu. Stærsta blekkingin hefði kannski verið sjálfblekkingin hjá þeim. „Menn héldu að þeir myndu standa þetta allt af sér," sagði Árni.

Þá benti Árni á að bankamenn hefðu treyst á stuðning frá Seðlabankanum ef hlutirnir gengu ekki upp. Það hefði verið hluti vandans. „Menn urðu ásæknari vegna þess að þeir bjuggust við að ríkið myndi hlaupa undir bagga," sagði Árni.