Stórhækkun á orkuverði

Orkuverð frá Orkuveitu Reykjavíkur mun hækka um 28,5% þann 1. október. Þetta var ákveðið á eigendafundi Orkuveitunnar sem lauk klukkan hálf sjö í dag. Gert er ráð fyrir gjaldskrárhækkunin skili Orkuveitunni fjórum milljörðum króna og að hagræðingaraðferðir skili tveimur milljörðum aukalega í kassann.

Í fréttatilkynningu frá Orkuveitunni kemur fram að tekjur fyrirtækisins hafi rýrnað á síðustu árum og eins og staðan sé í dag geti Orkuveitan ekki staðið undir endurgreiðslu lána.

Haraldur Flosi Tryggvason, stjórnarformaður Orkuveitunnar, sagði að uppsagna að vænta hjá Orkuveitunni í samtali við Heimi Má Pétursson, fréttamann Stöðvar 2 í kvöld.

Í fréttatilkynningu frá Orkuveitunni kemur fram að raforkuverðshækkunin nemi 28,5%. Fyrir fjögurra manna fjölskyldu í fjölbýli þýði það um 2500 króna hækkun á mánuði. Gert er ráð fyrir að áhrifin á vísitölu neysluverðs séu 0,39% hækkun.

Þá er jafnframt vísað til hagræðingaaðgerða - gert sé ráð fyrir að draga saman um 2 milljarða í rekstrinum, sagt er að það verði meginviðfangsefni nýs forstjóra næstu vikur og mánuði og sé sú vinna þegar hafin:

„Tónninn hefur þegar verið gefinn af hálfu stjórnar með því að lækka laun forstjóra um hundruð þúsunda króna á mánuði. Hann hefur síðan staðið fyrir því að rýma efstu hæð Orkuveituhússins í því skyni að leigja hana út og afla þannig tekna," segir í tilkynningunni.

Þá er stefnt að selja ýmsar eignir sem Orkuveitan á. Þar á meðal Perluna, eignahluti í ýmsum félögum, líkt og HS Veitum og Landsneti, lóðir og landareignir.