Enginn ráðherra við mestu atvinnusköpun landsbyggðar

Daginn eftir að Jóhanna Sigurðardóttir forsætisráðherra lýsti í fréttum litlum áhuga á frekari uppbyggingu í áliðnaði hérlendis tók starfsmaður Alcoa-Fjarðaáls, Elías Jónsson, eða Elli á B-vaktinni, fyrstu skóflustungu að fjárfestingu, sem felur í sér mestu atvinnusköpun utan höfuðborgarsvæðsins frá því núverandi ríkisstjórn settist að völdum, og hlaut fyrir lófaklapp samstarfsmanna.

Hér er að hefjast smíði kersmiðju, þar sem fram mun fara endurnýjun og viðhald á kerjum álversins, - í byggingu sem verður yfir fjögur þúsund fermetrar að stærð. Tómas Már Sigurðsson, forstjóri Alcoa á Íslandi, segir þetta merkilegan áfanga, ekki aðeins fyrir fyrirtækið, heldur svæðið í heild. Þetta sé 3,5 milljarða króna fjárfesting sem skapi 170 störf á byggingartíma og smíði ljúki í apríl árið 2012. Kersmiðjan skapi 70 störf til frambúðar, til viðbótar við þau rúmlega 800 störf sem eru hjá Fjarðaáli.

Raunar er þessi uppbygging, ásamt framleiðsluaukningu Alcan í Straumsvík, eina nýsköpunin sem eitthvað kveður að í iðnaði hérlendis í tíð núverandi ríkisstjórnar. Athygli vakti að enginn ráðherra var viðstaddur athöfina á Reyðarfirði í dag, eins og jafnan hefur tíðkast við tíðindi sem þessi, og fékkst sú skýring frá talsmanni Alcoa að þeim hafi ekki verið boðið og því hafi þeir sennilega ekki vitað af þessu.

Erna Indriðadóttir, upplýsingafulltrúi Alcoa, segir að litið hafi verið á þetta sem athöfn fyrst og fremst fyrir heimamenn og því hafi aðeins starfsmönnum og bæjarráði Fjarðabyggðar verið boðið.