Salmonellusýkt kjúklingafóður - sprenging í fjölda sýktra kjúklinga

Gríðarleg aukning hefur verið á salmonellusmitum í kjúklingi á þessu ári. Það sem af er árs hefur 21 sláturhópur verið innkallaður vegna rökstudds gruns um salmonellusmit, sem eru um þrjú og hálft prósent allra sláturhópa. Í liðinni viku innkölluðu bæði Reykjargarður og Matfugl kjúkling úr verslunum vegna salmonellu.

Á árunum 2005 til 2007 komu engin salmonellusmit upp á íslenskum kjúklingabúum. Árið 2008 greindist síðan smit í um einu prósenti af eldishópum og var þeim því fargað. Árið þar á eftir greindist smit í 0,8 prósent eldishópa. Það má því líkja við að sprenging hafi orðið á þessu ári en eins og staðan er nú hefur salmonellusmit greinst í um fimm prósentum eldishópa.

Erfitt er að segja til um með fullkominni vissu um orsakir þessara smita en samkvæmt upplýsingum frá Matvælastofnun eru sterkar líkur á að hluti smitanna hafi komið til eftir að kjúklingunum var gefið salmonellusmitað fóður.

Hráefnið í kjúklingafóður er almennt flutt hingað til lands óblandað og algengt að smit sé í hráefninu, að því er fram kemur hjá stofnuninni. Þegar fóðrið er blandað er það hins vegar hitað nægilega mikið til að drepa allt smit. Það er því síðar sem smitið kemur til, hvort sem það er við flutning fóðursins eða geymslu.

Kjúklingabændur gera hvað þeir geta til að hindra útbreiðslu salmonellunnar en það reynist oft erfitt á stærri búum.

Taka ber fram að smitaður kjúklingur er hættulaus fari neytendur eftir leiðbeiningum um eldun kjúklings, steiki í gegn og sjái til að blóðvökvi fari ekki í aðra vöru.

Til skýringar skal tekið fram að eldishópur er hópur jafn gamalla alifugla sem er alinn í sama eldishúsi þar sem allir fuglar hafa aðgang að sama eldisrými. Sláturhópur er hins vegar eldishópur eða hluti af eldishópi sem er slátrað á sama degi.