Lögreglan rannsakar saurmengun á Þingvöllum

Lögreglurannsókn er hafin á seyrulosunarmálinu á Þingvöllum. Sýnataka úr neysluvatni síðan á miðvikudag bendir ekki til að vatn sé mengað, þó óyggjandi niðurstöður liggi enn ekki fyrir.

Heilbrigðiseftirlit Suðurlands hóf sýnatöku úr neysluvatni sumarhúsa á Þingvöllum eftir að upp komst um að Holræsa- og stífluþjónusta Suðurlands hefði losað skólpvatn úr rotþróm á vatnsverndarsvæði fyrir rúmri viku síðan.

Annað mánudagssýnið reyndist ekki innihalda saurgerlamengun, heldur var gerlafjöldi yfir heilsufarsmörkum. Sýni tekið á sama stað á miðvikudag reyndist svo drykkjarhæft, segir Heilbrigðiseftirlitið. Hitt mánudagssýnið mældist hins vegar greinilega saurgerilmengað, en ekki voru tekin sýni á sama stað og það á miðvikudag. Heilbrigðiseftirlitið mun áfram fylgjast náið með neysluvatni á svæðinu og umfangsmeiri sýnataka er fyrirhuguð á morgun sem mun að öllum líkindum skila marktækari niðurstöðum.

Þá hefur heilbrigðiseftirlitið kallað eftir magntölum frá fyrirtækinu, meðal annars til að kanna hvort það standist á sem dælt er upp úr rotþrónum og það sem er fargað með viðurkenndum hætti. Samkvæmt heimildum fréttastofu hefur nokkur fjöldi fólks haft samband við eftirlitið vegna óánægju með þjónustu fyrirtækisins.

Heilbrigðiseftirlitið hefur ekki viljað skera endanlega úr um hvort vatnsmengunin sem mælst hefur stafi af athæfi fyrirtækisins, en búast má við niðurstöðum eftirlitsins fyrir vikulok.

Sumarhúsaeigendur í Kárastaðalandi á Þingvöllum hafa kært fyrirtækið til lögreglu, en lögreglan í Árnessýslu segir rannsókn málsins vera í fullum gangi. Meðal annars hafi forsvarsmaður Stífluþjónustunnar verið kallaður til yfirheyrslu. Rannsókninni verður hraðað eins og auðið er, en búast má við að ákvörðun verði tekin um hvort ákæra verði gefin út á næstunni.