Kærleiksganga vegna kúbverskra feðga gengin í dag

Kærleiks og friðarganga fyrir hinn kúbverska Alberto Borges og fjölskyldu hans verður gengin frá Hallgrímskirkju klukkan tvö í dag.

Gengið verður niður Skólavörðustíg, Bakarabrekku, um Austurstræti og niður á Ingólfstorg, þar sem verða ræðuhöld og tónlistaratriði. Borges og sonur hans ákváðu að flýja land eftir að ráðist var að heimili þeirra og þeim hótað.

Þeir sem standa að göngunni hvetja fólk til þess að koma með sem fjölbreyttasta þjóðfána í gönguna. Með göngunni vilja aðstandendur hennar sýna þessari fjölskyldu og öllum nýbúum og gestum þessarar jarðar að okkur sé ekki sama um fólkið í borginni okkar, eins og það er orðað.