Dregið úr kynbundnum launamun hjá borginni

Árangur hefur náðst síðasta áratug við að draga úr kynbundnum launamun hjá Reykjavíkurborg. Úttekt um málið var lögð fram á síðasta borgarráðsfundi og staðfestir hún niðurstöður rannsóknar frá 2008 sem sýnir að Reykjavíkurborg hefur náð árangri á síðasta áratug við að draga úr launamun kynjanna.

En betur má ef duga skal því úttektin leiddi einnig í ljós að munur á heildalaunum kynja er 5.1 hjá borginni þegar leiðrétt hefur verið fyrir innbyrðis röðun starfa. Þessi munur heildarlauna, sem felst í yfirvinnugreiðslum og akstursgreiðslum, er óútskýrður og ekki er ljóst að hve miklu leyti hann er málefnalegur eða ómálefnalegur, að því er fram kemur í tilkynningu frá borginni.

Þó er um að ræða mun minni óútskýrðan launamunur en þekkist úr sambærilegum innlendum og erlendum rannsóknum. Um 77% starfsmanna Reykjavíkurborgar eru konur.