Tillaga Hönnu Birnu um aukna samvinnu samþykkt

Tillaga Hönnu Birnu Kristjánsdóttur, forseta borgarstjórnar, um aukna samvinnu og samráð borgarfulltrúa var samþykkt á fundi borgarráðs í morgun. Þar er lagt til að sameiginlegir vinnufundir allra borgarfulltrúa verði fastur liður í starfsáætlun borgarstjórnar. Hanna Birna segir að tilgangur tillögunnar sé fyrst og síðast að bæta störf borgarstjórnar og tryggja góðar lausnir fyrir borgarbúa.

Tillagan gerir ráð fyrir að vinnufundirnir skuli að jafnaði haldnir mánaðarlega og hafa það að markmiði að auka samstarf borgarstjórnar allrar um stefnumótun og brýn verkefni borgarbúa. Forsætisnefnd kemur til með að boða til fundanna og undirbýr dagskrá í samstarfi við borgarstjóra, en fyrsti sameiginlegi vinnufundur nýrrar borgarstjórnar skal haldinn áður en borgarstjórn kemur aftur saman í byrjun september.

„Á seinni hluta síðasta kjörtímabils voru stigin mikilvæg skref í átt til aukinnar samvinnu allrar borgarstjórnar, þvert á flokka og þvert á meirihluta og minnihluta," segir Hanna Birna í tilkynningu.

„Sú skoðun okkar að slík vinnubrögð skili mestum árangri fyrir borgarbúa hefur ekkert breyst, þrátt fyrir að staða okkar sé breytt. Við viljum leggja okkar að mörkum til að gera góða borg enn betri og því var þessi tillaga um ný vinnubrögð í borgarstjórn lögð fram og við fögnum þeim góðu undirtektum sem hún hlaut," segir Hanna Birna.