Dyravörðunum sagt upp - Þorfinnur Ómars kærir líkamsárás

„Að mínu mati er þetta ekki fréttnæmt. Ég ræddi við Þorfinn áðan. Hann vildi sjálfur ekki að þetta færi í fréttir. Þetta er lítilvægt mál," segir Gunnar Már Þráinsson, eigandi skemmtistaðarins Barböru, í samtali við Vísi. Þorfinnur Ómarsson, fjölmiðlamaður, og þrjá konur hafa kært dyraverði Barböru fyrir líkamsárás á laugardagskvöldið. Dyravörðunum hefur verið sagt upp störfum.

Pressan greindi frá málinu fyrr í kvöld. Þar er haft eftir Þorfinni að honum og konunum hafi verið vísað út af staðnum eftir að hann gerði athugasemd við að starfsmaður hreinsaði glös af borði sem ekki hafði verið klárað úr. Þorfinnur segir að dyraverðirnir hafi ekki getað látið það vera að taka á sér á leiðinni út. Þegar út var komið komu fleiri dyraverðir að og keyrðu hann í götuna og settu hné í bakið á honum. Sjálfur segir Þorfinnur að ringulreið hafi ríkt fyrir utan staðinn og að dyraverðirnir hafi gengið í skrokk á konunum. Gunnar Már segir að sér hafi verið sagt að fjórmenningarnir hafi átt upptökin.

„Ein er handleggsbrotin, önnur með brotna framtönn og allar þrjár lemstraðar eða tognaðar, kápurnar rifnar og þar fram eftir götunum. Þær eru danskennarar þannig að þær eru frá vinnu út af þessu. Sjálfur gat ég naumast hreyft hægri höndina daginn eftir og er rétt farinn að geta lyft henni núna," hefur Pressan eftir Þorfinni en eiginkona hans starfar sem dansari.

Gunnar Már segist hafa rætt við Þorfinn um málið áðan. Sjálfur var hann ekki á staðnum þegar atvikið átti sér stað. „Svona gerist stundum en það eru tvær hliðar á öllum málum," segir Gunnar Már sem vonar að málið leysist farsællega og í góðu milli allra aðila. Hann segir að dyraverðunum þremur hafi verið sagt upp störfum þangað til annað komi í ljós. Á morgun hyggst Gunnar Már afhenda lögreglu upptökur úr eftirlitsmyndavélum á skemmtistaðnum.