Tveggja vikna heimsókn lokið

Sendinefnd frá Alþjóðagjaldeyrissjóðnum, undir forystu Julie Kozack, lauk í gær tveggja vikna heimsókn sinni til Íslands. Á heimasíðu Seðlabanka Íslands segir að tilgangur heimsóknarinnar var að ræða við íslensk stjórnvöld um fjórðu endurskoðun efnahagsáætlunar stjórnvalda og Alþjóðagjaldeyrissjóðsins.

Sendinefndin fundaði með stjórnvöldum, þingmönnum, háskólasamfélaginu, fulltrúum einkageirans og aðilum vinnumarkaðarins. Viðræður munu halda áfram á næstu vikum í því augnamiði að endurskoðun efnahagsáætlunarinnar verði tekin fyrir hjá stjórn sjóðsins í lok árs 2010 eða við upphaf árs 2011.