Alþingi getur stöðvað þjóðaratkvæðagreiðslu

Alþingi getur stöðvað þjóðaratkvæðagreiðslu um Icesave í miðjum klíðum ef Bretar og Hollendingar fallast á nýtt samkomulag. Enn liggur þó ekki fyrir hvort þeir séu reiðubúnir til nýrra samningaviðræðna.

Þjóðaratkvæðagreiðsla um Icesave lögin fer fram fyrsta laugardaginn í mars en utankjörfundaratkvæðagreiðsla hefst á fimmtudag í næstu viku.

Margir hafa litið svo á að um leið og utankjörfundaatkvæðagreiðsla hefst verði ekki aftur snúið. Semja þurfi við Hollendinga og Breta fyrir atkvæðagreiðslu ellegar sitja uppi með áframhaldandi óvissu í Icesave málinu í einn og hálfan mánuð.

Alþingi getur hins vegar stöðvað þjóðaratkvæðagreiðsluna jafnvel þó að utankjörfundaratkvæðagreiðsla sé hafin. Einfaldlega með því að fella Icesave lögin úr gildi. Lögspekingar sem fréttastofa talaði við í dag segja að slík ákvörðun væri að fullu í samræmi við landslög.

Samkvæmt upplýsingum frá dómsmálaráðuneytinu var þessi möguleiki kannaður sérstaklega í undirbúningi þjóðaratkvæðagreiðslunnar. Því er ljóst að menn horfa til þessarar lausnar ef gert verður nýtt samkomulag við Breta og Hollendinga í millitíðinni.

Enn liggur hins vegar ekki fyrir hvort Bretar og Hollendingar hafi áhuga á því að ganga til samningaviðræðna á ný. Samkvæmt upplýsingum frá forsætisráðuneytinu ætti það að skýrast á næstu dögum.