Gætu verið handverk fimm manna

Taflmennirnir sem fundust á Lewis-eyju úti fyrir Skotlandi árið 1831 gætu verið handverk fimm mismunandi manna.

Eins og komið hefur fram er talið að taflmennirnir, sem eru 93 talsins, hafi verið skornir úr rostungstönnum á tólftu öld. Helsta kenningin um uppruna þeirra er sú að þeir hafi verið gerðir í Noregi. Guðmundur G. Þórarinsson verkfræðingur hefur hins vegar nýlega sett fram þá tilgátu að þeir séu skornir út hér á Íslandi. Hann rökstuddi þessa tillögu á ráðstefnu í Edinborg í Skotlandi um síðustu helgi og er sagður hafa fengið góðar undirtektir fræðimanna sem þar voru.

Dr. Alex Woolf, stjórnandi stofnunar miðaldafræða í Háskólanum í St. Andrews, hefur verið vantrúaður á tilgátu Guðmundar. Aðspurður hvort afstaða hans hafi nú breyst bendir dr. Woolf á að ekki hafi verið um að ræða eiginlega málstefnu um uppruna Lewis-taflmannanna. Hins vegar hafi þar komið fram grein eftir konu að nafni Caroline Wilkinson. Í greininni séu sannfærandi rök fyrir því að taflmönnunum megi skipta í fimm hópa. Þótt þessir hópar hafi í breiðum skilningi líkan stíl þá séu þeir sennilega gerðir af mismunandi handverksmönnum eða -konum.

„Þannig að ég býst við að þetta auki möguleikann á því að um fleiri en einn upprunastað sé að ræða," segir Woolf og bætir við að hann telji einhvern í Lewis hafa safnað gripunum á löngum tíma. Það skýri hvers vegna þeir fundust einmitt þar. - gar