Engar eðlisbreytingar á umsóknarferlinu

Formaður utanríkisnefndar segir engar eðlisbreytingar hafa átt sér stað á umsóknarferli Íslands að Evrópusambandinu. Fulltrúi Sjálfstæðisflokksins segir ótækt að sambandið ætli að styrkja umsóknina um fjóra milljarða króna.

Utanríkismálanefnd Alþingis fundaði í gær með samninganefnd Íslands í aðildarviðræðum við Evrópusambandið um einstaka kafla umsóknarinnar. Andstæðingar aðildarinnar innan Sjálfstæðisflokks og Vinstri grænna hafa undanfarið haldið því fram að umsóknarferlið sé ekki í samræmi við samþykktir Alþingis. Verið sé að aðlaga íslenska stjórnsýslu að sambandinu.

Ástæðulaust að draga umsókina til baka

„Ég tel að það sé engar ákvarðanir verið að taka um aðlögun að regluverki sambandins," segir Árni Þór Sigurðsson, formaður utanríkismálanefndar. Um undirbúning sé að ræða komi til aðildar eftir þjóðaratkvæðagreiðslu. „En við erum auðvitað ekki komin þann stað ennþá."

Það sé því engin ástæða til að draga umsókn Íslands að sambandinu til baka, en þingsályktunartillaga þar að lútandi verður væntanlega endurflutt á Alþingi í haust. Ríki sem sækja um aðild að Evrópusambandinu geta fengið styrki til m.a. til að rannsaka hvar þarf að breyta og efla stjórnsýsluna við aðild.