Þrjár bílveltur

Ökumaður slasaðist nokkuð en farþegi minna þegar bíll valt út af Suðurlandsvegi í grennd við Hvolsvöll síðdegis í gær.

Fólkið var flutt með sjúkarbíl á Landsspítalann í Reykjavík en bíllinn er ónýtur. Talið er að ökumaður hafi misst stjórn á bílnum í óvæntri hálku.

Ökumaður var fluttur með sjúkarbíl til Reykjavíkur eftir að bíll hans valt út af þjóðveginum skammt frá Hvammstanga um svipað leiti.

Tvennt var flutt á sjúkrahúsið á Akranesi í gærkvöldi eftir bílveltu á Vesturlandsvegi skammt frá Haffjarðará á Snæfellsnesi. Hvorugt slasaðist þó alvarlega. Tildrög eru óljós.

Ökumaður sportbíls slapp hinsvegar ómeiddur þegar hann ók af miklu afli á vegrið á Reykjanesbraut í gærkvöldi.