Lýsir eftir fórnarlambi á spjallvef

„Þú sem varst úti að labba með hundinn þinn í Hafnarfirðinum í dag og varðst fyrir árás, viltu vinsamlegast gefa þig fram og koma til að tala við okkur. Þú veist hvar við búum."

Þetta stendur á spjallvefnum er.is en þar lýsir kona eftir annnarri konu sem varð fyrir árás tveggja hunda í gær. Samkvæmt lýsingu konunnar, sem skrifar færsluna, þá var frænka hennar úti að ganga með tvo hunda í Hafnarfirði þegar þeir réðust á konu um fertugt og smáhund sem hún var að viðra.

Konan skrifar að hún sé miður sín vegna málsins og segist ekki vita hvert hún eigi að snúa sér til þess að hafa uppi á konunni sem varð fyrir barðinu á hundunum.

„Okkur hjónunum langar að vita hvort það sé ekki allt í lagi með þig og hundinn þinn. Við höfum áhyggjur af þessu öllu...," skrifar hún en frænka konunnar, sem var úti að viðra árásahundana, sagði konunni heimilisfangið hjá þeim og því viti hún hvert skal leita.

„Mér þykir rosalega fyrir þessu :( Ef einhver hérna kannast við konuna þá má sá hinn sami biðja hana um að hafa samband. Konan var í kringum fertugt, með millisítt hár, gleraugu og lítin hund," skrifar konan svo á spjallvefinn en nafn hennar kemur ekki fram.

Viðbrögð við lýsingu konunnar hefur að mestu verið góð. Þó kemur fram á vefnum að henni hafi borist hótanir í pósti vegna málsins, þá helst í ljósi þess að hún gerir ráð fyrir að hundunum verði lógað vegna málsins.

Hægt er að nálgast færslu konunnar hér.