Fólk getur í raun hannað hvað sem er

Nú stendur til að opna Fablab, stafræna smiðju þar sem fólk getur komið og hannað nær allt sem því dettur í hug, á Sauðárkróki. Þorsteinn Broddason, verkefnastjóri hjá Impru á Nýsköpunarmiðstöð á Sauðárkróki, segir verkefnið hafa gengið vonum framar. Fablab hefur verið með opið hús síðustu tvo daga í tilefni af Alþjóðlegri athafnaviku.

„Við erum búin að fá á annað hundruð heimsóknir í gær og í fyrradag,“ segir hann. „Það er mjög gaman að sjá hvernig fólk grípur þetta. Fólk á eftir að geta komið hingað inn og hannað prótótýpur að nær hverju sem er.“

Þorsteinn segir einungis grunnþekkingu á tölvur vera nauðsynlega til þess að nýta sér smiðjuna. Ef einhverjum tæknilegum atriðum sé ábótavant, eins og hönnunar­forritum, sé hægt að nálgast ókeypis útgáfur á internetinu fyrir nær hvað sem er.

„Við notum síðan stórar iðnvélar sem eru á smíðastofunni til að prenta út hlutinn sem á að framleiða,“ segir Þorsteinn.

Fablab hefur nú þegar opnað í Vestmannaeyjum og á Akranesi. Yfir fjörutíu Fablab-stöðvar eru um allan heim og segir Þorsteinn samstarfið á milli landa ganga mjög vel. - sv