Reyndu að sturta grasinu niður

Par var handtekið í fjölbýlishúsi á Selfossi í síðustu viku grunað um dreifingu fíkniefna. Um sextíu grömm af marijúana fannst í íbúðinni og hafði því verið pakkað í sölueiningar. Þegar að lögreglan fór inn í íbúðina var eigandinn í óðaönn að týna það ofan í klósettið en tókst ekki að koma því undan. Parið var flutt á lögreglustöð og dvaldi þar yfir nótt á meðan rannsókn fór fram.

Þá upprætti lögreglan kannabisræktun í íbúðarhúsi í Flóahreppi og í bílskúr í Hveragerði. Um lítið magn var að ræða í fyrra tilvikinu en í bílskúrnum í Hveragerði voru gróskumiklar plöntur í umsjá sambýlisfólks sem býr í íbúðarhúsi því er skúrinn tilheyrir. Þar fundust einnig áhöld til neyslu fíkniefna og merki um neyslu á hvítum efnum.