Fundur um makrílveiðar smábáts mikilvægari

Fjarvera Jóns Bjarnasonar af ríkisstjórnarfundi í gærmorgun hefur vakið athygli en af því tilefni lýsti Jóhanna Sigurðardóttir forsætisráðherra þeirri skoðun sinni að ríkisstjórnarfundur ætti að sitja fyrir erindagjörðum úti á landi.

Ríkisstjórnarfundurinn hófst klukkan hálftíu í gærmorgun en á þeirri stundu var Jón Bjarnason nýkominn upp úr Hvalfjarðargöngum á leið vestur á Snæfellsnes en þangað lagði hann af stað úr Reykjavík klukkan níu, samkvæmt upplýsingum frá aðstoðarmanni hans, Jóhanni Guðmundssyni, sem var með í för.

Meðan á ríkisstjórnarfundi stóð sat ráðherrann sem sagt í ráðherrabíl sínum á leið um Mýrar og Snæfellsnes enn hann var kominn á Rif um klukkan ellefu. Þar fundaði hann með þremur fulltrúum útgerðar- og fiskvinnslufyrirtækisins Sjávariðjunnar, en það hefur gert út smábátinn Sæhamar til makrílveiða í sumar. Jón vildi afla sér upplýsinga um reynslu þeirra af makrílveiðum og heyra sjónarmið þeirra um framhaldið.

Eftir hádegið fór ráðherrann síðan í Grundarfjörð þar sem hann fundaði með ráðamönnum útgerðarfyrirtæksins Guðmundar Runólfssonar en þeir hafa einnig verið að þróa sig áfram með makrílveiðar. Þessa fundi kaus ráðherrann fremur en að sitja ríkisstjórnarfund í gær.