Biskup biðjist afsökunar

Séra Þórhallur Heimisson, sóknarprestur í Hafnarfjarðarkirkju, segir vaxandi stuðning meðal presta við að skipuð verði sannleiksnefnd til að rannsaka meint kynferðisbrot Ólafs Skúlasonar, fyrrverandi biskups. Hann segist skilja gremju almennings til Þjóðkirkjunnar sem telji að ekki sé verið að gera málin upp. Þórhallur vill að Karl Sigurbjörnsson, biskup, biðjist afsökunar fyrir hönd kirkjunnar.

Meint brot Ólafs hafa verið til umræðu undanfarna daga. Fyrr í vikunni lagði séra Sigríður Guðmarsdóttir til að yfirstjórn kirkjunnar færi þess á leit við dómsmálaráðherra að sett verði saman óháð sannleiksnefnd til að rannsaka ásakanir um þöggun íslensku þjóðkirkjunnar í máli Ólafs. Prestafélagið hefur boðað til félagsfundar eftir helgi til að ræða málið.

Þórhallur var gestur í þættinum Í bítið á Bylgjunni í morgun. Þar var hann spurður út í gremju almennings og úrsagnir úr Þjóðkirkjunni. „Þetta eru náttúrulega búin að vera hræðileg mál sem hafa tekið langan tíma og það sér ekki fyrir endann á."

Þórhallur sagði nóg komið af vangaveltum og að kominn væri tími til að biskup og stjórn kirkjunnar bæðu umræddar konur afsökunar og fyrirgefninar á því hafa ekki hlustað á þær á sínum tíma. Hann sagði að það væri grundvallaratriði.

Vaxandi stuðningur við sannleiksnefnd

Þá tók Þórhallur undir með Sigríði og sagði brýnt að stofnuð verði sérstök sannleiksnefnd. „Mér finnst nauðsynlegt að kirkjan biðji dómsmálaráðherra um aðstoð við að stofna sannleiksnefnd eins og rætt hefur verið um. Sem yrði óháð kirkjunni og stæði fyrir utan hana til að fara yfir þessi mál í eitt skipti fyrir öll. Nefnd sem geti spurt þá út í sem tengdust málinu á sínum tíma, farið yfir öll skjöl og birt óháða niðurstöðu."

Aðspurður hvort hann telji raunhæft að þessi leið verði farinn sagðist Þórhallur svo vera. Vaxandi hópur presta vilji fara þessa leið og hann hafði rætt málið við formann Prestafélagsins í gær. „Ég held að það sé mjög mikill þungi hjá mörgum að óska eftir að þetta verði gert. Mér finnst þetta vera algjört grundvallaratriði."

Hægt er að hlusta á viðtalið hér.