Ágreiningur leystur í Svíþjóð vegna ákvæða í samningi

Norðurál hefur stefnt HS Orku fyrir gerðardóm í Svíþjóð vegna ágreinings um magn og verð á raforku fyrir álver í Helguvík. Ástæða þess að ágreiningurinn verður leystur í Svíþjóð er ákvæði í samningi HS Orku og Norðuráls og hefur ekkert með eignarhaldið á HS Orku að gera.

Ragnar Guðmundsson, forstjóri Norðuráls, sagði í samtali við fréttastofu í morgun að ágreiningurinn við HS Orku sneri bæði að magni og verði raforku vegna álversins í Helguvík. Hann sagðist hins vegar ekki geta farið nánari út í ákvæði samningsins þar sem hann væri bundinn trúnaði.

Norðurál tilkynnti HS Orku það í júlí síðastliðnum að fyrirtækið hygðist skjóta ágreiningi um magn og verð raforku fyrir Helguvík til gerðardóms sænska viðskiptaráðuneytisins, en að sögn Ragnars Guðmundssonar er það vegna ákvæðis í samningi milli HS orku og Norðuráls og hefur ekkert að gera með eignarhaldið á HS Orku, en fyrirtækið er sem kunnugt er að stærstu leyti í eigu sænsks dótturfélags Magma Energy.

Júlíus Jónsson, forstjóri HS Orku, segir ágreiningur vegna Helguvíkur hafi ekki áhrif á önnur viðskipti fyrirtækjanna tveggja, sbr. verð á raforku til álversins á Grundartanga. Hann segir að menn séu hreinlega ekki sammála um hversu mikið magn raforku HS Orka beri að afhenda vegna Helguvíkur.

„Menn eru ósammála um hversu mörg megavött okkur beri að afhenda samkvæmt samningnum með tilliti til allra fyrirvara. Varðandi verðið, þá var settur varnagli í samninginn um lágmarksarðsemi og síðan teljum við að það náist ekki með því verði sem er í samningnum," segir Júlíus. Hann segir að lagðir hafi verið ákveðnir útreikningar fyrir Norðurál sem fyrirtækið hafi ekki sætt sig við. Júlíus segir að krafan um arðsemi hafi ekki komið til vegna breyttrar stefnu nýrra eigenda, þ.e Magma Energy, á HS Orku heldur hafi þessi umræða um verðið átt sér stað síðan í október 2009, nokkru áður en Magma hafi komið að stjórn fyrirtækisins. Júlíus segist ekki geta svarað því hvenær niðurstaða sænska gerðardómsins muni liggja fyrir.