Svandís mæti á fund þingnefndar

Vigdís Hauksdóttir, þingmaður Framsóknarflokksins, vill að Svandís Svavarsdóttir, umhverfisráðherra, komi á fund umhverfisnefndar Alþingis og ræði áform um stækkun friðlands í Þjórsárverum og rammaáætlun Norðlingaölduveitu. Áður höfðu fjórir þingmenn úr þremur flokkum óskað eftir því að Svandís og Katrín Júlíusdóttur, iðnaðarráðherra, kæmu á fund iðnaðarnefndar.

Vidgís bendir á að fyrir Alþingi liggi frumvarp um verndar- og nýtingaráætlun vegna virkjunar fallvatna og háhitasvæða. Vinna við rammaáætlun fái stjórnskipulega stöðu innan stjórnkerfisins þegar frumvarpið verði samþykkt. Hún segir að í frumvarpinu sé gert ráð fyrir að verkefnastjón rammaáætlunar flokki svæði í þrjá flokka, þ.e. friðunarflokk, biðflokk og nýtingarflokk. Þá segir Vigdís að Þjórsárver séu einstök náttúruperla og afar miklar líkur séu á að þau fari í friðunarflokk hjá verkefnastjórninni.

„Það er hneyksli að umhverfisráðherra fari fram nú og dragi Norðlingaölduveitu út úr rammaáætlun í stað þess að láta málin ganga sinn farveg. Með þessari ákvörðun standa Þjórsárver berskjölduð gangvart hentistefnu stjórnvalda hverju sinni í stað þess að þau verði friðuð í eitt skipti fyrir öll í rammaáætlun," segir Vigdís í tilkynningu. „Þetta er óásættanlegt framkoma gagnvart náttúru landsins."