Evrópuári að ljúka - lokaráðstefna haldin í dag

Senn lýkur Evrópuári 2010 - gegn fátækt og félagslegri einangrun og af því tilefni var haldin vegleg lokaráðstefna í Ráðhúsi Reykjavíkur í dag. Í tilkynningu segir að þar hafi verið kynnt helstu verkefni og rannsóknir er hlutu styrki í tilefni Evrópuársins.

„Einnig voru kynntar helstu niðurstöður fundar með þjóðfundarsniði sem haldinn var í maí og fjallaði um fátækt og félagslega einangrun. Í ávarpi sínu á ráðstefnunni lagði félags- og tryggingamálaráðherra áherslu á að þrátt fyrir að Evrópuárinu væri nú að ljúka héldi baráttan gegn fátækt og félagslegri einangrun áfram," segir ennfremur.

„Evrópuárinu lýkur senn en baráttunni gegn fátækt og félagslegri einangrun er síður en svo lokið. Mikilvægur grunnur hefur hins vegar verið lagður með þessu átaki þar sem fjölda verkefna hefur verið ýtt úr vör. Megintilgangur verkefnisins var að auka vitund almennings um aðstæður þeirra einstaklinga sem búa við fátækt og félagslega einangrun, en að sama skapi að vinna að því að gera fólki kleift að rjúfa vítahring fátæktar og félagslegrar einangrunar. Ég tel að okkur hafi orðið vel ágengt með þessi markmið," sagði Guðbjartur Hannesson, félags- og tryggingamálaráðherra, en ráðuneyti hans var framkvæmdaaðili Evrópuársins 2010 á Íslandi.

Markmiðið að skapa umræðu

Þá segir að alls hafi 21 verkefni eða rannsóknir verið styrkt hérlendis af Evrópuárinu 2010 „og hafa mörg þeirra blómstrað fram úr vonum og jafnvel getið af sér fleiri verkefni. Auk þessa var fjöldi annarra verkefna skipulagður í tilefni ársins og má þar nefna ljósmyndasýningu, bíósýningar og fundi."

„Mikilvægur þáttur í Evrópuárinu 2010 var að skapa umræðu um fátækt og félagslega einangrun þar sem einblínt hefur verið á lausnir og leiðir út úr vandanum," segir Linda Rós Alfreðsdóttir, verkefnisstjóri ársins. Fjölmiðlar tóku virkan þátt í umfjölluninni en hátt í 100 fréttainnslög birtust vegna verkefna tengdum árinu.

Aukið upplýsingaflæði, virðing og virkni



„Meðal hápunkta Evrópuársins hérlendis var stór fundur með þjóðfundarsniði um fátækt og félagslega einangrun," segir ennfremur. „Þar komu saman þeir sem upplifa fátækt og félagslega einangrun, stjórnmálamenn og aðilar sem vinna að málefnum þessa fólks. Helstu niðurstöður fundarins hafa nú verið teknar saman og afhentar ráðherra. Meðal áhersluatriða þar má nefna nauðsyn þess að auka upplýsingaflæði um ýmsa þjónustu sem er í boði, mikilvægi menntunar og aðgengis að námskeiðum, að lágmarksframfærsla verði skilgreind og virðing sé borin fyrir öllum."

„Þetta eru allt mikilvæg atriði sem við þurfum að vinna að. Nú þegar er unnið að því að skilgreina neysluviðmiðin og vonumst við til að geta kynnt niðurstöður þar um von bráðar," segir félags- og tryggingamálaráðherra. „Við munum fara vandlega yfir þessar niðurstöður og taka mið af þeim þegar kemur að stefnumótun ráðuneytisins. Betur sjá augu en auga og það er lykilatriði að við stöndum öll saman í þessari baráttu, bæði þeir sem upplifa fátækt og félagslega einangrun og þekkja vel af eigin reynslu hvar hnökrana er að finna, sem og þeir sem veita þeim þjónustu. Það er sameiginlegt takmark okkar allra að eyða þessu þjóðfélagsmeini. "

Fjölmörg verkefni hafa notið stuðnings Evrópuársins og voru mörg þeirra kynnt á rástefnunni í dag.Þar má nefna sjálfsstyrkingarnámskeið, fyrir konur og fyrir pólska karlmenn og Mömmueldhúsið sem var stofnað á árinu til að berjast gegn atvinnuleysi kvenna af erlendum uppruna. Af áhugaverðum erindum á lokaráðstefnunni má nefna umfjöllun um rannsóknir á líðan og stöðu atvinnulausra, rannsókn á áhrifum starfsendurhæfingar og rannsókn á fátækt og félagslegum aðstæðum öryrkja.