Segir Icelandic taka upp þvingunarkerfi

Óánægju gætir hjá forvígismönnum samtaka í sjávarútvegi með ákvörðun Icelandic Group um að innleiða svonefnda MSC-vottun í þorsk- og ýsuveiðum við Ísland.

MSC stendur fyrir Marine Stewardship Council sem er sjálfseignarstofnun sem heldur úti vottunarstaðli fyrir sjálfbærar fiskveiðar. Greiða þarf fyrir aðild að kerfinu.

Icelandic Group tilkynnti um ákvörðun sína í lok síðasta mánuðar, mánuði áður en íslenskt vottunarkerfi fyrir þorskveiðar, undir merkinu Iceland Responsible Fisheries, verður tekið í notkun. Í framhaldinu á það að ná yfir veiðar fleiri tegunda. Unnið hefur verið að íslenska vottunarkerfinu undir forystu Fiskifélags Íslands með þátttöku stjórnvalda.

Friðrik J. Arngrímsson, framkvæmdastjóri Landssambands íslenskra útvegsmanna, er lítt hrifinn af MSC-kerfinu. Það sé þvingunarkerfi með óeðlilegum leikreglum. „Við teljum ófært að til þess að fá að eiga viðskipti með fisk séu menn þvingaðir til að borga þessum aðila lausnargjald. Það gengur ekki að einn aðili á alþjóðavísu ákveði hvort menn fái að selja ákveðnum aðilum fisk.“ Íslenskur sjávarútvegur verði að vera frjáls frá slíku fyrirkomulagi.

„Við hefðum kosið að Icelandic hefði látið reyna á íslenska kerfið sem byggir á viðmiðum Matvæla- og landbúnaðarstofnunar Sameinuðu þjóðanna. Með því verður sýnt fram á að við stundum ábyrgar veiðar en því fylgir ekki svona lausnargjald.“ Friðrik kveðst ekki vita hvort þessi afstaða LÍÚ og fleiri aðila í sjávarútvegi torveldi hráefnisöflun Icelandic. Sambandið hafi ekki yfir félagsmönnum að segja.

„Það eru vonbrigði að stjórnendur Icelandic Group hafi tekið þessa ákvörðun nú rétt áður en íslenska vottunarkerfið er innleitt og að þeir hafi ekki verið tilbúnir að sjá hvernig því myndi reiða af,“ segir Arnar. Hann kveðst þó skilja að þrýstingur kunni að hafa verið á fyrirtækinu sem sé fjölþjóðlegt. „Þarna ráða markaðslegar ástæður hjá stjórnendum en mín skoðun er að við eigum að standa saman um íslenska kerfið. Það hefur tekið of langan tíma að koma því á fót en nú sér fyrir endann á því.“ Aðspurður kveðst Arnar vona að MSC-vottun Icelandic hafi ekki neikvæð áhrif á íslenskan sjávarútveg.

bjorn@frettabladid.is