Sósíalistar og stórkapítalistar hafa náð sátt um tvö verkefni

„Sósíalistarnir hafa náð saman við stórkapítalistana um tvö verkefni sem þeir vilja vinna að samtímis,“ sagði Sigmundur Davíð Gunnlaugsson, formaður Framsóknarflokksins. „Annars vegar að koma skuldum gjaldþrota banka yfir á íslenskan almenning og hins vegar að koma í veg fyrir að íslenskur almenningur fái leiðrétt stökkbreytt lán sín í íslensku bönkunum.“

Ummælin féllu í umræðu um Icesave-málið við upphaf þing­fundar í gær. Tilefnið voru ummæli Jóns Sigurðssonar, forstjóra Össurar, í Ríkisútvarpinu um að óleyst Icesave-deila hefði haft mjög neikvæð áhrif á viðskiptalífið og ímynd Íslands. Magnús Orri Schram, Samfylkingu, sagði að þar sem drög að nýjum Icesave-samningi lægju fyrir hefði frést að Moody‘s ætlaði að hækka lánshæfismat íslenska ríkisins. „Slíkt hefur bein áhrif á fjármögnunarkostnað íslenskra fyrirtækja,“ sagði hann.

Sigmundur Davíð sagði að mikil áróðursherferð væri nú hafin fyrir nýjum Icesave-samningi sem þó væri ekki tilbúinn. Þeir forstjórar sem mest hefðu verið á bandi ríkisstjórnarinnar í deilunni létu nú aftur á sér kræla. „Lánshæfis­matsfyrirtækin [eru] meira að segja mætt til leiks í gegnum Samfylkingarmanninn á Bloomberg,“ sagði Sigmundur Davíð.

„Lánshæfismatsfyrirtækin, sem hafa nákvæmlega engan trúverðugleika lengur.“

Skuldatryggingaálag íslenska ríkisins, hinn raunverulegi mælikvarði á stöðu ríkisins, hefði batnað og batnað frá því að Icesave-samkomulaginu var hafnað í þjóðaratkvæðagreiðslu. - pg