Gæslan varar við ís

Þyrla Landhelgisgæslunnar TF-GNA fór í dag í gæslu- og hafíseftirlit fyrir Vestfirði. Kom þyrlan að ísrönd sem liggur milli Íslands og Grænlands til austurs. Kemur ísröndin næst landi um 21,7 sjómílu norður af Horni, 25,3 sjómílur frá Straumnesi og 43,6 sjómílur frá Barða, þar er hafísinn orðinn samfrosinn og með stórum íshellum sem getað verið hættulegar skipum.

Í fréttatilkynningu frá Landhelgisgæslunni kemur fram að þar sem ísinn er næst landi, eða 21,7 sjómílur norður af Horni sé ísinn nokkuð gisinn og virðist þar hafa átt sér stað talsverð nýmyndun á ís. Fyrir utan Straumnes hafi ísinn verið þéttur en þegar komið var að hafís sem staðsettur er 43,6 sjómílur frá Barða var ísbreiðan samfrosinn með stórum íshellum. Þar sáust fimm stórir borgarísjakar sem voru frá 30 metrum og upp í 110 metra á hæð.

Ekki er talin stafa mikil hætta af sjálfum borgarísjökunum þar sem þeir sjást vel á ratsjá og voru vel innan við ísröndina. Voru þeir þó nokkuð sprungnir og ekki er talið ólíklegt að brotni úr þeim. Getur þá stafað af þeim hætta.