Útkall hjá slökkviliði: Grauturinn brann við

Slökkviliðið var kallað út um klukkan sex í morgun þar sem tilkynning hafði borist um reykjarlykt og skynjara í gangi í Mávahlíð í Reykjavík. Þegar dælubíll og sjúkrabílar komu á staðinn kom í ljós að reykurinn stafaði frá potti á eldavél. Sjúkraliðar snéru því frá en slökkvilliðsmennirnir reykræstu íbúðina.

Töluverður erill var í sjúkraflutningum en frá klukkan hálfátta í gærkvöldi fóru sjúkrabílar á höfuðborgarsvæðinu í 24 útköll. Vaktstjóri hjá slökkviliðinu segir að það sé vel yfir meðallagi í miðri viku.