Ákærur gætu verið samþykktar með minnihluta atkvæða

Svo gæti farið að ákæra á hendur fyrrverandi ráðherrum verði samþykkt með minnihluta atkvæða á Alþingi, vegna þess að hjásetuatkvæði eru ekki talin með.

Mikil óvissa ríkir um hvernig alþingismenn greiða atkvæði um tvær þingsályktunartillögur um ákæru á hendur annars vegar fjórum og hins vegar þremur fyrrverandi ráðherrum. Það er þó nokkuð ljóst að 16 þingmenn Sjálfstæðisflokksins munu ekki greiða atkvæði með tillögunum og að 15 þingmenn Vinstri grænna muni greiða atkvæði með ákæru á hendur fjórum ráðherrum ásamt þremur þingmönnum Hreyfingarinnar.

Alger óvissa ríkir um afstöðu 20 þingmanna Samfylkingarinnar, en samkvæmt heimildum fréttastofunnar er næsta víst að þar á bæ muni þingmenn ekki allir greiða eins atkvæði. Þá er talið að það sama gildi um þingmenn Framsóknarflokksins.

„Í okkar þingflokki lá fyrir að hver og einn ætti að taka ákvörðun á sínum forsendum en ekki flokksforsendum," segir sigmundur Davíð Gunnlaugsson, formaður Framsóknarflokksins.

Sigmundur segir menn enn vera að skoða málið og ómögulegt að sjá fyrir hvernig atkvæði skiptist.

„Umfræðan um þetta er orðin alpólitísk," segir Sigmundur Davíð.

Í atkvæðagreiðslum um mál á Alþingi telst hjáseta þingmanna ekki með, bara já og nei atkvæði. Tæknilega gæti það því gerst að t.d. 23 þingmenn vildu ákæra, átján vildu það ekki en 22 þingmenn sætu hjá. Þá væri ákæra samþykkt með atkvæðum minnihluta þingmanna. Aðspurður hver væri versta mögulega niðurstaðan svarar Sigmundur:

„Versta niðurstaðan er sú að þetta dragist á langinn og að engin niðurstaða fáist í málið og grafi undan trúverðugleika stjórnmálanna," segir Sigmundur sem þykir umræðan þegar einkennast af flokkapólitík.