Nokkur frumvörp afgreidd á lokametrunum

Nokkur stjórnarfrumvörp hafa verið afgreidd til nefnda og þriðju umræðu á Alþingi í fyrradag og í gær. Reyna á að afgreiða þau sem lög frá þinginu áður en því verður slitið í lok næstu viku.

Í gær var frumvarp um breytingar á stjórnarráðinu afgreitt sem lög. Það kveður á um sameiningu dómsmála-, mannréttinda og samgönguráðuneytanna í eitt innanríkisráðuneyti og heilbrigðis-, félags- og tryggingamálaráðuneytisins í eitt velferðarráðuneyti. Þær breytingar eiga að taka gildi um áramót. Þá munu iðnaðar-, sjávarútvegs- og landbúnaðarráðuneyti sameinast í atvinnumálaráðuneyti og umhverfisráðuneytið einnig verða ráðuneyti auðlindamála. Síðari breytingarnar munu taka gildi 1. apríl. 2011.

Þá var frumvarp umhverfisráðherra til skipulagslaga, sem kveða á um landnýtingu til framtíðar, afgreitt til nefndar. Frumvarpið er í 57 liðum og mjög viðamikið.

Frumvarp iðnaðarráðherra um afnám iðnaðargjalda, í samræmi við dóm Mannréttindadómstóls Evrópu um ólögmæti þess, og endurráðstöfun þeirra gjalda sem þegar hafa verið innheimt, var einnig afgreitt til þriðju umræðu, sem og þrjú frumvörp dómsmálaráðherra um aukin réttindi innflytjenda og hælisleitenda.

Í gær fór svo frumvarp um stjórnlagaþing einnig til þriðju og síðustu umræðu.

- sh