Búist við svipaðri þátttöku og síðast

 Búist er við að þátttaka í Reykjavíkurmaraþoni Íslandsbanka, sem fram fer í dag, verði svipuð og síðustu tvö ár, eða nálægt ellefu þúsund manns. Skráningarhátíð Reykjavíkur­maraþons Íslandsbanka stóð í gærdag, milli klukkan tíu árdegis og sjö að kvöldi.

Boðið var upp á margvíslegar uppákomur um leið og hlaupa­garpar sóttu skráningargögn, svo sem bol, númer í hlaupinu, tímatökuflögu og fleira.

Sömuleiðis gátu þeir sem ekki höfðu forskráð sig í hlaupið skráð sig á staðnum. Í tilkynningu bankans kemur fram að í gærmorgun hafi tæplega 7.600 manns verið búnir að skrá sig.

Að venju eru hlaupnar nokkrar vegalengdir: maraþon, 42,2 kílómetrar; hálfmaraþon, 21,1 kílómetri; 10 kílómetrar og þriggja kílómetra skemmtiskokk.

Á vefnum hlaupastyrkur.is er hægt að heita á þá hlaupara sem hafa valið að hlaupa í þágu góðs málefnis. Opið er fyrir áheit allt til miðnættis mánudaginn 23. ágúst.

- óká