Hafa eftirlit með farsímanotkun ökumanna

Lögreglan hefur síðastliðna tíu daga lagt áherslu á eftirlit með farsímanotkun ökumanna án handfrjálss búnaðar og notkun stefnuljósa. Þá hefur lögreglan fylgst með og boðað ökumenn með bifreiðar sínar í skoðun sem ekki eru með skráningarmerki bæði að framan og aftan á ökutækjum sínum eða skráningarmerkin ógreinileg einhverra hluta vegna.

Á myndinni sem fylgir fréttinni eru upplýsingar um fjölda slíkra skráðra brota á þessu tímabili bornar saman við sama tímabil árin 2008 og 2009 þegar ekki var um sérstakt átak lögreglu að ræða.

Lögreglan hvetur ökumenn til að huga að þessum atriðum og þá sér í lagi að tala ekki í farsíma án handfrjálss búnaðar. Þannig virða þeir rétt annarra vegfarenda til öryggis í umferðinni um leið og þeir gæta að eigin öryggi.