Réttað að nýju yfir meintum fíkniefnasmyglurum

Hæstiréttur hefur úrskurðað að rétta þurfi að nýju yfir fimm mönnum sem ákærðir voru fyrir stórfellt fíkniefnasmygl. Ástæðan er sú að héraðsdómari tók sér of langan tíma í að dæma málið.

Málið snýst um innflutning á nær fjórum kílóum af amfetamíni.sem falin voru í málningarfötum og þeim komið fyrir í pakka sem var póstlagður í Danmörku.

Fimm voru ákærðir fyri þátt sinn í málinu og var réttað í því byrjun árs. Málið var tekið til dóms við lok aðalmeðferðar 18. janúar en dómur var svo upp kveðinn 19. febrúar.

Fimmmeningarnir voru dæmdir sekir og var sá sem sagður var höfuðpaur dæmdur í tæplega 4 ára fangelsi.

En þegar dómurinn var kveðinn voru liðnar meira en fjórar vikur frá því að málið var dómtekið en það er sá tími sem dómarar hafa samkvæmt lögum til að dæma í málum sem þessum.

Hæstiréttur ómerkti því í gær dóm héraðsdóms og vísaði málinu heim í hérað til nýrrar meðferðar. Því þarf að flytja málið upp á nýtt sem getur þýtt að kalla þurfi vitni fyrir dóminn að nýju, að ný gögn verði lögð fram og niðurstaða dómarans verði því ekki endilega sú sama og áður.

Það var Guðjón Marteinsson sem dæmdi málið í héraði.