Frjálsíþróttafólk slegið óhug

Fréttir af árásum á heimili kúbversku feðgana Alberto og Ramon Borges hafa vakið óhug á meðal íþróttafólks sem þekkir þá vel af góðu starfi þeirra innan frjálsíþróttahreyfingarinnar. Þetta kemur fram í tilkynningu á vef Frjálsíþróttasambands Íslands.

Þar segir að faðirinn, Alberto, hafi hafið störf á Íslandi sem frjálsíþróttaþjálfari fyrir 10 árum síðan og hafi m.a. sinnt ýmsum störfum fyrir FRÍ. Ramon hafi stundað frjálsíþróttir um árabil og keppti fyrir skömmu í unglingalandsliði FRÍ á Norðurlandamóti á Akureyri. Ekki þurfi að efast um að þeir eigi samúð meðal frjálsíþróttafólks og góðan stuðning í baráttunni fyrir því að geta snúið aftur til starfa og leiks í því öryggi og umburðarlyndi sem allir Íslendingar vilji njóta.

Á vef Frjálsíþróttasambands Íslands segir jafnframt að frjálsíþróttahreyfingin hafi lagt áherslu á að allir væru velkomnir til þátttöku í starfi hennar, innan vallar sem utan, án tillits til hörundslitar, uppruna, kyns, trúarbragða eða annarra mannréttindaþátta. Stjórn Frjálsíþróttasambandsins hvetur íþróttafólk og velunnara íþrótta til að standa vörð um þessi gildi og styðja við baráttu gegn brotum á þeim.

Eins og fram hefur komið flúðu feðgarnir land vegna ógnar sem þeim stafaði af mönnum sem höfðu í hótunum við Ramon. Hann hafði átt í deilum við nemendur í Menntaskólanum í Kópavogi sem er talið að hafi verið kveikjan að þeim hótunum sem hann var beittur.