Greiðslur Kjalar aftur skertar um 19 prósent

Lífeyrisgreiðslur úr lífeyrissjóðnum Kili, sem er í vörslu Landsbankans, hafa verið skertar um nítján prósent. Þetta var tilkynnt á ársfundi sjóðsins í síðustu viku. Greiðslur úr sjóðnum voru einnig skertar um nítján prósent í fyrra. Alls hefur skerðingin því numið 34,4 prósentum frá hruni.

Halldór Kristinsson, framkvæmdastjóri sjóðsins, segir þetta vera beina afleiðingu af bankahruninu, þar sem sjóðurinn hafi tapað um 20 prósentum eigna sinna. „Tryggingafræðileg staða sjóðsins var neikvæð um 21 prósent og þá bar sjóðnum lagaleg skylda til að skerða réttindin," segir Halldór.

Kjölur er einn þeirra fimm lífeyrissjóða í vörslu Landsbankans sem sérstakur saksóknari tók til rannsóknar í mars 2009 vegna gruns um að þar hefði verið fjárfest umfram heimildir í tilteknum félögum, meðal annars Landsbankanum og tengdum félögum. Annar sjóðanna fimm, Lífeyrissjóður Eimskipafélags Íslands, hafði þá runnið inn í Kjöl. Sú rannsókn stendur enn yfir en er langt komin, að sögn Ólafs Þórs Haukssonar, sérstaks saksóknara.

Halldór segist lítið hafa frétt af rannsókninni. Hann er ekki sakborningur, enda tók hann ekki við sjóðnum fyrr en eftir hrun. Hann segist ekkert hafa séð í störfum sínum fyrir sjóðinn sem bendi til þess að nokkuð óeðlilegt hafi átt sér stað. „Nei, þú sérð að ef þú berð þetta tap saman við tap annarra lífeyrissjóða sem eru ekki í vörslu hjá bönkum eða fjármálastofnunum þá er þetta mjög sambærilegt," segir hann.

Halldór segir mikla skerðingu skýrast af því að sjóðurinn sé lokaður, sem þýðir að enginn greiðir lengur í hann iðgjöld. Slíkir sjóðir séu mun viðkvæmari fyrir skakkaföllum vegna fjárfestinga heldur en sjóðir sem geta treyst á innkomu til framtíðar.

Kjölur varð til árið 2007 þegar fimm lífeyrissjóðir sameinuðust; Lífeyrissjóður Mjólkursamsölunnar, Eftirlaunasjóður Olíuverslunar Íslands, Lífeyrissjóður flugvirkja, Lífeyrissjóður starfsmanna Áburðarverksmiðjunnar og Lífeyrissjóður Eimskipafélags Íslands.

Sjóðfélagar er um 4.500 og þar af fá yfir 800 nú greitt úr sjóðnum.stigur@frettabladid.is