Lögreglumenn fundu fíkniefni undir berum himni

Fíkniefni fundust við húsleit í Kópavogi í fyrradag en um var að ræða 50 grömm af marijúana og ámóta magn af hassi. Hluti fíkniefnanna fannst utandyra og þá lagði lögreglan einnig hald á 300 þúsund krónur í reiðufé sem var falið undir rúmdýnu í húsinu, að því er fram kemur á vef lögreglunnar.

Húsráðandi var handtekinn og játaði hann aðild sína að málinu. Upphaf þess var að lögreglan grunaði þrjá menn um fíkniefnamisferli. Þeir voru á ferð í bíl í bænum en reyndu að komast undan þegar átti að hafa tal af þeim. Þremenningunum var veitt eftirför sem síðar leiddi til áðurnefndrar húsleitar hjá umráðamanni ökutækisins. Mennirnir eru allir á þrítugsaldri.