Allsherjarnefnd gefur Atlanefndinni umsögn

Allsherjarnefnd mun fá þingsályktunartillögur um ákærur gegn ráðherrunum fjórum til umsagnar. Samkvæmt upplýsingum frá Róberti Marshall, formanni allsherjarnefndar, verður fyrsti fundur í nefndinni klukkan fjögur í dag. Allsherjarnefnd mun svo veita þingmannanefnd Atla Gíslasonar umsögn um málið. Róbert segir að umsögninni verði skilað eftir hádegi á föstudag.

Eftir að þingmannanefndin fær umsögn frá allsherjarnefnd mun þingmannanefndin svo klára álit sem til stendur að flytja á Alþingi. Ljóst er að nefndirnar verða að vinna málið nokkuð rösklega því að greiða þarf atkvæði um þingsályktunartillögurnar á þingfundi fyrir föstudag í næstu viku.