Ákærðir fyrir hrottalegt ofbeldi

Fjórir menn hafa verið ákærðir fyrir frelsissviptingu og stórfellda líkamsárás í Reykjanesbæ í apríl síðastliðnum. Mönnunum er gefið að sök að hafa svipt mann frelsi í fjórtán klukkustundir, beitt hann ofbeldi og hótað honum meira ofbeldi og lífláti ef hann greiddi ekki meinta skuld. Sá elsti fjórmenninganna er samkvæmt ákæru talinn hafa haft sig mest í frammi.

Í ákæru segir að mennirnir hafi ítrekað slegið fórnarlambið í andlit og skallað hann. Því næst hafi þeir læst hann inni í fataskáp og hengt logandi 400 vatta peru fyrir ofan hann. Þá hafi þeir vafið rafmagnssnúru um háls mannsins og dregið hann í snörunni. Maðurinn hafi nánast misst meðvitund vegna þessa. Hann var svo bundinn við stól og skilinn eftir klukkstundum saman.

Næsta dag fóru ofbeldismennirnir með manninn í banka þar sem honum var sagt að taka út peninga, því næst var haldið í apótek þar sem manninum var gert að leysa út lyfseðil. Að síðustu neyddu þeir manninn til að stela verkfærum sem stóðu á gangstétt. Fórnarlamb ofbeldisins var handtekið skömmu síðar fyrir verkfærastuldinn.

Krafist er refsingar yfir öllum ákærðu og einnig að þeir greiði fórnarlambinu milljón króna í miskabætur auk málskostnaðar. - bþh