Banaslysum fækkar um 42%

Negld vetrardekk geta minnkað líkur á banaslysum í hálku um 42 prósent samkvæmt rannsókn sem unnin var af sænsku umferðaröryggisstofnuninni Trafikverket.

Þetta gengur þvert á niðurstöður annarra rannsókna sömu stofnunar sem bentu til þess að ónegld dekk væru nokkurn veginn jafn örugg og þau negldu, að því er fram kemur í frétt á vef Félags íslenskra bifreiðaeigenda.

Nýja rannsóknin sýnir þó að engu skiptir hvort bílar sem búnir eru svokölluðum ESC-skrikvarnarbúnaði eru á nagladekkjum eða ónegld­um dekkjum. Sænska umferðaröryggisstofnunin gengur svo langt að ráðleggja þeim sem ekki eru á bílum sem búnir eru ESC-skrikvörn að vera ekki á ónegldum dekkjum í vetrarfærð. Þá hvetur forstjóri stofnunarinnar sveitarfélög sem ætli sér að að banna nagladekk til að endurskoða þau áform.

ESC-skrikvörn er í ýmsum nýlegum bílategundum, en er ekki staðalbúnaður nema í bílum sem gætu flokkast sem lúxusbifreiðar. Búnaðinum er ætlað að koma í veg fyrir að bílar skriki, sem leiðir oft til slysa þegar ökumenn missa stjórn á bílunum. Evrópuþingið samþykkti í ár að frá nóvember 2011 skuli allir nýir bílar vera með slíkan búnað. - bj