Tæp 11% treysta Alþingi vel

Einungis 10,5% landsmanna bera mikið traust til Alþingis, ef marka má nýja könnun MMR. Þeir voru 18% í sömu könnun MMR frá því í september. Jafnframt fjölgar þeim sem segjast bera lítið traust til Alþingis, eru nú 56,4% en voru 52,4% í september 2009.

Þeim sem bera mikið traust til lífeyrissjóðanna fækkar frá fyrri könnunum, nú segjast 9,8% bera mikið traust til þeirra borið saman við 16,7% í könnuninni frá september 2009. Að sama skapi hefur vantraust á lífeyrissjóðunum aukist, í desember 2008 sögðust 32,7% bera lítið traust til lífeyrissjóðanna en nú segjast 61,8% bera lítið traust til þeirra.

Lögreglan nýtur trausts 78,9% aðspurðra sem er svipað og í fyrri könnunum MMR. 69,7% segjast bera mikið traust til Háskóla Íslands og 54,2% segjast bera mikið traust til Háskólans í Reykjavík sem er sambærilegt hlutfall og í fyrri könnunum. Þeim sem segjast bera mikið traust til Ríkisútvarpsins fækkar, nú bera 51,8% mikið traust til Ríkisútvarpsins en hlutfallið var 64,2% í könnun MMR í september 2009. Þessar fjórar ofantaldar stofnanir njóta áfram mun meira trausts en aðrar stofnanir sem spurt var um í könnuninni.

Þeim fjölgar lítillega sem segjast bera lítið traust til ríkisstjórnarinnar. 58,9% segjast bera lítið traust til hennar nú en 54,8% sögðust bera lítið traust til hennar í september 2009. 19,3% aðspurðra segjast bera mikið traust til ríkisstjórnarinnar sem er svipað og var í desember 2008 en þá sögðust 19,2% bera mikið traust til ríkisstjórnarinnar. Tæp 54% segjast bera lítið traust til stjórnarandstöðunnar og 14,0% segjast bera mikið traust til hennar.

Bankakerfið situr enn á botninum en 4,6% segjast bera mikið traust til þess og flestir aðspurðra vantreysta bankakerfinu eða 77,8%.