Svipt sjálfræði vegna alvarlegrar átröskunar

Hæstiréttur hefur staðfest úrskurð Héraðsdóms Reykjavíkur um að að ung kona verði svipt sjálfræði í tólf mánuði á meðan hún fær meðferð við átröskun. Velferðarsvið Reykjavíkurborgar fór fram á sjálfræðissviptinguna en sjúkdómur konunnar er kominn á mjög alvarlegt stig og er það mat meðferðaraðila að án meðferðar sé hún í lífshættu.

Í kröfu Velferðarsviðs fyrir héraðsdómi kom fram að konan hafi greinst með alvarlega átröskun á unglingsaldri Þá hafi hún einnig greinst með geðrof og hafi nánast ekkert innsæi í sjúkdóm sinn. Konan var vistuð nauðug á geðdeild Landspítalans þann 11. ágúst og er stefnt að því að hún verði lögð inn á Kleppsspítala til langtíma endurhæfingar. Mat meðferðaraðila konunnar er að sjálfræðissviptingin sé „nauðsynleg til að vernda líf og heilsu" konunnar, eins og segir í úrskurði héraðsdóms.