Lokafrestur rann út í ágúst

„Ég er á kafi í að ganga frá skýrslunni. Við erum að ljúka henni,“ segir Maríanna Jónasdóttir, fulltrúi Steingríms J. Sigfússonar fjármálaráðherra og formaður starfshóps á vegum fjármálaráðuneytisins.

Hópurinn var settur á laggirnar seint í apríl og á að leggja fram heildstæðar tillögur að breytingum á skattkerfinu fyrir áramót. Fyrstu áfangaskýrslu átti að skila 15. júlí. Erfiðlega gekk að setja saman samráðsnefnd hagsmunaaðila og var skilafrestur framlengdur til 31. ágúst.

Skýrslan lét bíða eftir sér og sagði Maríanna í samtali við Fréttablaðið í byrjun september að verið væri að leggja lokahönd á hana. Ekkert hefur þó bólað á henni.

Maríanna segir styttra í afhendingu fyrstu áfangaskýrslunnar nú en nokkru sinni. „Vonandi tekst okkur að afhenda hana ráðherra á morgun [í dag].“

Á morgun kynna Viðskiptaráð og Samtök atvinnu­lífsins sameiginlega skýrslu upp á hundrað blaðsíður um nauðsynlegar umbætur á skattkerfinu. Eftir því sem næst verður komist er hún samin af um þrjátíu sérfræðingum í skattamálum og sett fram til höfuðs skýrslu fjármálaráðherra. - jab