Öllum brugðið í Vesturbæjarskóla

Fólki var brugðið þegar að það sá tvo skúra sem voru svona illa útlítandi, segir Hildur Hafstað, skólastjóri í Vesturbæjarskóla. Vísir sagði frá því fyrr í dag að foreldrar barna í Vesturbæjarskóla væru æfareiðir vegna tveggja hrörlegra skúra sem settir voru upp við Vesturbæjarskóla í gærkvöld. Þeir eiga að hýsa sjö ára gamla nemendur skólans.



Slysahætta af húsunum

Hildur segir að starfsfólk og foreldrar hafi tekið eftir því í morgun að ekki væri búið að girða í kringum skúrana. Því hafi þau óttast að húsnæðið myndi skapa slysahættu. „Við vissum að það myndu koma tvö lítil hús en það hafði enginn séð þetta fyrir sér," segir Hildur. Fólk hafi ímyndað sér að húsin yrðu alveg út við Hringbraut og tækju ekki mikið pláss. Vegna strangra reglugerða hafi niðurstaðan hins vegar orðið sú að skúrarnir voru settir á miðja skólalóðina. Það takmarkar mjög leiksvæði barnanna.

Hildur segir að Fræðslustjóri Reykjavíkurborgar hafi komið í skólann í dag og rætt við foreldra. Þar hafi hann skýrt frá því að fræðsluyfirvöld myndu funda með Framkvæmdasviði Reykjavíkurborgar á morgun. Einnig verður Hildur sjálf viðstödd fundinn. „Ég held að allir séu sammála því að það þarf að finna varanlega lausn fyrir húsnæði frístundaheimilisins," segir Hildur. Lóð skólans sé of lítil til að bera það og því þurfi að leita annað. Hún segir að Vesturbæjarskóli sé of lítill og það verði að stækka hann. Þangað til verði að finna frístundaheimilinu sómasamlegan stað. Hildur á þó von á því að skúrarnir tveir sem komnir eru á lóðina verði gerðir upp og hafðir þar yfir veturinn.



Húsin lagfærð

Í tilkynningu frá Reykjavíkurborg sem send var fjölmiðlum síðdegis kemur fram að starfsfólk skólans hafi vaktað svæði skólans á meðan skólastarf stóð yfir í dag til að tryggja öryggi barnanna. Svæðið hafi verið girt af í öryggisskyni á meðan unnið verði við frágang á húsunum og svæðinu í kring.

Í tilkynningunni segir jafnframt að næstu daga verði unnið við lagfæringarnar á kennslustofunum en þær verði meðal annars málaðar og aðgengi bætt. Einnig verði hafist handa við að innrétta þær til að þjóna starfssemi frístundaheimilis. Þá segir að starfsemi hefjist ekki í húsnæðinu fyrr en að eftirlitsaðilar, eins og heilbrigðis- og eldvarnareftirlit, hafi gengið úr skugga um að það uppfylli þær kröfur sem gerðar séu til skólahúsnæðis.