Felldu tillögu um sannleiksnefnd

Meirihluti bæjarfulltrúa Sjálfstæðisflokksins í Reykjanesbæ felldu tillögu minnihlutans um að koma á fót þriggja manna nefnd sem átti að taka út stjórnkerfi og stjórnýslu Reykjanesbæjar. Fyrirmynd nefndarinnar hefði þá verið rannsóknarnefnd Alþingis.

Við teljum nauðsynlegt að hreinsa borðið svo við getum haldið áfram," segir Friðjón Einarsson, bæjarfulltrúi Samfylkingarinnar en hann ásamt tveimur öðrum bæjarfulltrúum lögðu fram tillöguna sem var felld.

Meðal þess sem nefndin átti að kanna var stjórnsýsla bæjarins og aðkoma stjórnmálamanna að fjárhagslegum ákvörðunum á undanförnum árum með tilliti til þess hvort gætt hafi verið eðlilegrar hlutlægni og heiðarleika í þeim afskiptum.

Þá átti nefndin einnig að kanna hvort einstakir embættismenn, bæjarfulltrúar eða frambjóðendur til bæjarstjórnar hefðu hagnýtt sér persónulega eða í þágu síns flokks tengsl við fjársterka aðila sem hafa átt í viðskiptum við bæinn.