Sundlaugadómur markar tímamót vegna verðtryggðra lána

Lögfræðingar segja niðurstöðu héraðsdóms um forsendubrest vegna óvæntrar verðbólgu marka tímamót. Dómurinn varpi nýju ljósi á mál skuldara með verðtryggð lán.

Fjölskipaður Héraðsdómur Reykjaness hefur kveðið úr um að óvænt verðbólga í kjölfar bankahrunsins teljist vera forsendubrestur í deilumáli verktaka og eignarhaldsfélags. Eignarhaldsfélagið þurfti að greiða verktakanum meira en 110 milljónir í verðbætur, þar sem verktakinn gat ekki séð hrun efnahagskerfisins þegar hann gerði tilboð í viðkomandi verk sem var bygging sundlaugarinnar á Álftanesi.

Í verðbólguspá Seðlabankans fyrir árið 2008 var spáð 4% verðbólgu á verktímanum, en svo fór hins vegar að byggingavísitalan hækkaði um 30 prósent. Skuldarar verðtryggðra lána hafa fundið sambærilega hækkun á höfuðstól lána sinna frá ársbyrjun 2008, en síðan þá hefur verðbólgan verið um 28 prósent.

Björn Þorri Viktorsson, lögfræðingur, segir segir löngu tímabært að kastljósið færist einnig á verðtryggð lán eftir mikla umræðu um gengistryggingu, en fyrstu dómsmálin sem snúa að verðtryggingunni verða þingfest innan skamms. Björn segir verðbólgudóminn marka klár tímamót, ekki síst fyrir skuldara verðtryggðra lána.

Sonja Ýr Þorbergsdóttir, lögfræðingur BSRB, segir erfitt að meta áhrif dómsins á almenna skuldara þar sem um flókinn verksamning er að ræða.