Danmarks Radio segir Indefence pólitísk samtök

Þátturinn fjallaði að mestu um þátt Indefence í Icesave deilunni og rætt var við Magnús Árna Skúlason fyrrum stjórnarmann í Seðlabankanum sem er einn af talsmönnum Indefence.

Magnús Árni hafnaði því að Indefence væru pólitísk samtök en lát þess getið að hann hefði áður verið meðlimur í Sjálfstæðisflokknum en sagt sig úr honum í mars á síðasta ári.

Fram kom í þættinum að Sigmundur Davíð Gunnlaugsson formaður Framsóknarflokksins hefði verið einn af stofnendum Indefence á sínum tíma og að hann hefði síðan flækst fyrir í Icesave samningunum eftir bestu getu.

Þá var fjallað um skipan Magnúsar Árna í stjórn Seðlabankans að undirlagi Sigmundar Davíðs og þess að Magnús Árni þurfti að segja sig úr stjórn bankans eftir að upp komst um gjaldeyrisviðskipti á vegum ráðgjafafélags Magnúsar Árna. Viðskipti sem gengu gegn stefnu Seðlabankans.

Þessi tengsl Magnúsar Árna og Sigmundar Davíðs sýna að mati stjórnenda þáttarins að Indefence hópurinn sé pólitískur öfugt við það sem hópurinn sjálfur heldur fram.

Í lok þáttarins var rætt við Lars Houbakke Sörensen lektor við háskólann í Árósum sem fjallaði um klíkusamfélagið á Íslandi og vandamálið við að fáar persónur skipast í valdastöður. Sörensen nefndi Davíð Oddsson sem dæmi en hann gengdi stöðum forsætisráðherra, utanríkisráðherra, seðlabankastjóra og nú ritstjóra Morgunblaðsins á örfárra ára tímabili.

Sörsensen telur að fámennt klíkusamfélagið sé eitt af innanmeinum samfélagsins á Íslandi.