Nick Cave valdi Ólöfu Arnalds

„Það er frábært að fá að spila á undan Nick Cave í hans heimalandi," segir tónlistarkonan Ólöf Arnalds, sem hitar upp fyrir hljómsveitina Grinderman á tónleikum í Tasmaníu í Ástralíu um miðjan janúar.

Forsprakki Grinderman er Ástralinn Nick Cave, sem hefur haldið tónleika hér á landi og einnig unnið með leikhópnum Vesturporti. Fyrirhugaðir eru nokkrir tónleikar með Ólöfu í Ástralíu í janúar og í framhaldi af því höfðu Cave og félagar samband við hana.

„Út af því að það var ljóst að ég yrði í Ástralíu á þessum tíma var ég eitt af þeim atriðum sem komu til greina. Mér skilst að þeir hafi valið mig úr þeim hópi," segir Ólöf en um eina tónleika verður að ræða. Hún hefur lengi fylgst með ferli Nicks Cave. „Þetta er flottur listamaður og mikið skáld líka. Þetta verður mjög spennandi."

Ólöf gaf nýlega út sína aðra plötu, Innundir skinni, sem hefur hlotið frábæra dóma bæði hér heima og erlendis. Lagið Madrid sem er að finna á plötunni var nýlega valið lag ársins í flokki söngvaskálda og hlýtur það einnig að teljast mikill heiður fyrir Ólöfu.

„Mér finnst ánægjulegt að þetta lag skyldi fá þetta vægi því ég var frekar ánægð með það og hvernig ég samdi það," segir hún en lagið var ekki gefið út á smáskífu.

Ítarlegt viðtal við Ólöfu verður birt í Fréttablaðinu á morgun þar sem hún talar um nýju plötuna og tónleikaferð sína um Evrópu og Bandaríkin. Þar hitaði hún upp fyrir frönsku sveitina Air og bandarísku grúppuna Blonde Redhead.

Hér fyrir ofan er hægt að horfa á myndbandið við lagið Surrender af nýrri plötu Ólafar. Því er leikstýrt af Árna & Kinski. Björk syngur með Ólöfu í laginu. - fb