Mengunarslys í Eskifirði: Ekki of seint brugðist við

Bæjaryfirvöld í Fjarðarbyggð segja ekki hafa verið brugðist of seint við mengunarslysi sem varð á sunnudaginn fyrir viku þegar löndunarvökvi úr skipi blandaðist drykkjarvatni bæjarbúa. Bréf var sent til bæjarbúa í gær vegna málsins.

„Alvarleiki málsins kom ekki í ljós fyrr en í gær," segir Þorsteinn Kristjánsson, forstjóri Eskju en það var við löndun skips á vegum félagsins sem mengunarslysið átti sér stað. Í tilkynningu frá Eskju segir að starfsmanni Tandrabergs ehf hafi orðið á mistök sem leiddu til þess að löndunarvatnið blandaðist neysluvatni bæjarins.

Spurður hvað sé í löndunarvatni skips segir Þorsteinn það aðallega blóðvatn úr fiski. „Það var skolað úr kerfinu og bærinn gerður vatnslaus og þar með héldu bæjaryfirvöld að þetta væri í lagi, svo var farið að rannsaka þetta í gær og þá kom í ljós að svo var ekki."

Jón Björn Hákonarson, forseti bæjarstjórnar Fjarðarbyggðar, segir bæinn ekki hafa dregið lappirnar í þessu máli. Eftir mengunarslysið hafi mælingar sýnt að engin hætta væri á ferðum en það hefði hins vegar breyst í gær þegar hættulegt magn kólígerla fundust í drykkjarvatni. Það væru hins vegar ekki saurkólígerlar sem væru afar hættulegir.

„Við búumst við að klára hreinsun um helgina," segir Jón Björn en þangað til er bæjarbúum gert að sjóða drykkjarvatn.