Niinistö: Vaxtakröfur Breta og Hollendinga allt of háar

Heimir Már Pétursson skrifar frá Finnlandi:

Sauli Niinistö, forseti finnska þingsins segir að Bretar og Hollendirngar fari fram á allt of háa vexti af Íslendingum vegna Icesave. Það verði hinsvegar ekki gott fyrir Íslendinga að verða fyrsta þjóðin á vesturlöndum sem stendur ekki við skuldbindingar sínar.

Niinistö, sem margir telja að verði næsti forseti Finnlands eftir frosetakosningarnar 2012 sat fyrir svörum norrænna fréttamanna í þinginu í dag. Þegar hann var spurður um afstöðu finnsku ríkisstjórnarinnar til Icesave deilunnar á milli Íslendinga og Breta og Hollendinga sagði hann þá fara fram á allt of háa vexti af Íslendingum. Bretar og Hollendingar yrðu að semja um betri kjör við Íslendinga. Hann minnti hins vegar á að Finnland hefði verið eina landið á vesturlöndum sem greiddi stríðsskaðabætur sínar eftir seinni heimstyrjöldina að fullu. Þótt það hafi reynst Finnum erfitt hafi það skapað þeim virðingu á meðal annara þjóða.

Án þess að leggja nokkuð mat á málið að örðu leyti teldi hann að það yrði ekki gott fyrir Íslendinga að verða fyrsta þjóðin á vesturlöndum sem stæði ekki við alþjóðlegar skuldbindingar sínar. Hann sagði finnsk stjórnvöld og Finna almennt standa með Íslendingum í þeim vanda sem nú steðji að og að það væri ánægjulegt og mikilvægt að Íslendingar væru í samstarfi við Alþjóðagjaldeyrissjóðinn.