Kanna samhengi milli bólusetningar við svínaflensu og drómasýki

Landlæknisembættið kallar eftir upplýsingum frá læknum til að kanna hvort samhengi sé á milli bólusetningar við svínaflensu og drómasýki. 150 þúsund Íslendingar hafa verið bólusettir við inflúensunni.

Drómasýki eða narcolepsy er taugasjúkdómur sem veldur svefntruflunum. Fleiri börn hafa greinst með drómasýki á síðustu sex mánuðum í Finnlandi og í Svíþjóð en áður og tilfelli hafa einnig verið tilkynnt í Noregi, Þýskalandi og Frakklandi. Heilbrigðisyfirvöld á Norðurlöndum hafa séð ástæðu til að kanna hvort þessa aukningu megi rekja til bólusetningu við H1N1 inflúensu eða svínaflensu. Það sama er uppi á teningnum hér.

„Við höfum verið að senda út spurningalista til lækna sem hugsanlega gætu séð þessa sjúklinga og hversu mörg tilfelli þeir hafa greint á undanförnum árum. Það er byrjunin á þessari rannsókin," segir Þórólfur Guðnason, yfirlæknir á sóttvarnarsviði. Hann telur ólíklegt að það séu einhver tengsl milli bólusetningar við svínaflensu og drómasýki.

Finnar hafa hætt að gefa bóluefnið en þeir Íslendingar sem eftir því óska geta hæglega fengið sprautu. Íslenska ríkið keypti bóluefni fyrir 380 milljónir króna og til eru 150 þúsund skammtar af efninu á lager. Yfirlæknir segir þó af og frá að menn hafi farið fram úr sér.

„Hér á Íslandi voru tæplega 200 einstaklingar sem lögðust inn á sjúkrahús. 20 einstaklingar voru mjög veikir á gjörgæslu í öndunarvélum í langan tíma. Spítalarnir hafa aldrei séð vona slæman innflúensufarald," segir Þórólfur.

Það mun enn vera of snemmt að segja að svínaflensufaraldinum sé lokið. Á suðurhvelijarðar, þar sem vetur hefur ríkt, hefur hann verið allskæður svo vel er fylgst með þróuninni hér á Norðurhveli segir yfirlæknir.