Gera úttekt á búsetu utangarðsfólks úti á Granda

Velferðarráð Reykjavíkur samþykkti í dag að gerð verði úttekt á því hvernig til hefur tekist með búsetu fólks í smáhýsum á Granda og þeirri þjónustu sem þar hefur verið veitt. Í fréttatilkynningu frá Velferðarráði kemur fram að töluverður órói hefur verið í kringum smáhýsin á undanförnum vikum og umræða um þau skapaðist við fráfall gestkomandi konu þar í síðustu viku.

Björk Vilhelmsdóttir, formaður Velferðarráðs, segir að ráðið leggi áherslu á samráð við þá sem búa í smáhýsunum, þá fjölmörgu sem koma að þjónustu við þessa borgarbúa og nágranna á svæðinu við mat á stöðunni. Björk Vilhelmsdóttir, formaður Velferðarráðs, segist hafa bent á að það sé hlutverk Reykjavíkurborgar að veita heimilislausu fólki húsnæði. Samfélagið vilji ekki að fólk þurfi að búa á götunni. „Það er mikilvægt að þjónustan sem veitt er mæti þörfum þeirra sem hana fá og að um hana skapist friður," segir Björk í tilkynningunni.

Á síðasta ári var staða utangarðsfólks kortlögð og rannsökuð af Velferðarsviði og Nýsköpunarsjóði námsmanna. Þjónusta við þennan hóp borgarbúa hefur aukist á síðastliðnum tveimur árum meðal annars með aðstöðu til dagdvalar, færanlegu Heilsuhýsi sem sinnir heilsuvernd fyrir jaðarhópa, og nýju stöðugildi félagsráðgjafa sem sinnir utangarðsfólki á vettvangi. Þessi aukna og bætta þjónusta er í samræmi við stefnu í málefnum utangarðsfólks sem samþykkt var haustið 2008 og nær til ársins 2012.

Næsta skref í aukinni þjónustu er nýtt heimili fyrir utangarðskonur. Undirbúningur fyrir það er á lokastigi og verður hægt að bjóða konum sem tilheyra þessum hópi framtíðarheimili innan nokkurra vikna.

Björk segir að á fundinum hafi einnig verið lögð fram tillaga VG um að skipa fimm manna nefnd kjörinna fulltrúa til að kortleggja stöðu utangarðsfólks. Sú tillaga hafi verið felld með 6 atkvæðum fulltrúa Besta flokksins, Samfylkingarinnar og Sjálfstæðisflokksins, enda þurfi í dag aðgerðir og þjónustu en ekki nýja nefnd um það sem nýbúið er að fjalla um og ákveða.