Bjarni Ben opinn fyrir viðræðum um myndun nýs meirihluta á Alþingi

Formaður Sjálfstæðisflokksins er opinn fyrir viðræðum um myndun nýs meirihluta á Alþingi og útilokar ekki samstarf við Samfylkinguna. Hann segist skynja óánægju meðal þingmanna stjórnarflokkanna en segir hins vegar engar viðræður hafa átt sér stað.

Ræða Jóhönnu Sigurðardóttur, forsætisráðherra á mánudag, þar sem hún gagnrýndi störf þingmannanefndarinnar og lýsti efasemdum um ákærur á hendur fyrrverandi ráðherrum kom flestum þingmönnum í opna skjöldu. Þingmenn Samfylkkingarinnar sem fréttastofa hefur rætt við segja að með ræðunni hafi forsætisráðherra skipt um skoðun í málinu, en hún hafði stutt starf nefndarinnar áður. Ræðan olli mikilli reiði meðal þingmanna Vinstri grænna og andrúmsloftið var slíkt að rætt var um stjórnarslit, en þetta er ekki í fyrsta sinn á kjörtímabilinu sem hriktir í stoðum stjórnarsamstarfsins.

Þingmenn Sjálfstæðisflokksins sem fréttastofa hefur rætt við segja að margir þingmenn Samfylkingarinnar hafi ítrekað ljáð máls á óánægju með stjórnarsamstarfið. Þar vegi atvinnumálin þyngst eða skortur á atvinnuuppbyggingu réttara sagt, en atvinnuleysið er 7,3 prósent sem þýðir að tólf þúsund manns þræða göturnar án atvinnu, í óvissu um framtíð sína.

Samkvæmt heimildum fréttastofu hafa slík samtöl ítrekað átt sér stað milli þingmanna Sjálfstæðisflokks og Samfylkingarinnar og óánægjan virðist krauma undir stjórnarsamstarfinu.

Hefur þú fundið fyrir þessari óánægju þingmanna Samfylkingarinnar? „Já, ég skynja það að það eru ekkert allir í stjórnarliðinu ánægðir með það sem er að gerast. Og hver væri það í sjálfu sér, því nú eru hagvaxtarspár að falla og þær vonir sem menn voru með fyrir þetta ár virðast ekki vera að ganga eftir," segir Bjarni Benediktsson, formaður Sjálfstæðisflokksins.

Aðspurður segir hann að ekki hafi átt sér stað þreifingar milli Sjálfstæðisflokksins og Samfylkingarinnar um myndun nýs meirihluta. Værir þú hlynntur slíkum viðræðum? „Ég tel að það sem er mikilvægast í dag fyrir íslenskt þjóðfélag er að það verði horfið frá stefnu núverandi ríkisstjórnar og geti ég myndað samstarf við aðra flokka, hvaða flokkur sem það kann að vera, um að hverfa frá þessari stefnu og hleypa lífi að nýju í efnahagslífið þá er ég alltaf tilbúinn að setjast niður og gera það," segir Bjarni. Þannig að þú ert opinn? „Já, algjörlega."